Daagbook vanne Prins
Neet gevraogdj…
zunjig 14 juli: ich bin neet gevraogdj.. OLS is gewaest.. wie verwacht moog ich nog wachte.. immers 2 jaor achter elkaar oet de vereiniging gebeurdj neet, toch?
Of toch…
zunjig 21 juli: Tim Suntjens geit mit nao ‘de moedige manne’ op zunjigmurge biej Ruudje… Allein haaj der nog ein apaart berichtje ontvange op ziene gsm en kwoom dus ieëst nao mich haen.. Of ich zoget ouch gehadj haaj.. en waat sting d’r op ziene sjermke: Wils dich de prins van de Kwekkerte waere…
Natuurlik volmondig: Jao! Daonoa höbbe v’r der biej den Tegel de neudige gedronke.. Oeteindelik zeen dao ouch mien ieërste 2 adjes (Tim Suntjens en Roy Poels) gevraogdj gewoore…
Adjes (deil 1)…
Zaoterdig 27 juli: Badmintoernooi biej Café ’t Benkske.. De ieërste paar oer woor ’t veural sjule veur de raege (en den mer beer drinke).. Mer nao 16u werd t dreug.. en toet 2u ‘s nachts werdj der volop gebadmintont.. Dae aovendj höb ich Roy Leduc en Oscar Wennink gevraogd. Die oeteraardj dao euver noa motte dinke.. Ouch logisch, want v’r es Kwekkerte höbbe ein väöl programma mit o.a. 14 recepties. Dus ich vraog neet zomèr get van eemes!
Schlager (deil 1)…
Zunjig 28 juli: begòs mit de prinse schlager. Enjao, daoveur mos get geluid opgenomme waere biej de vistrappe en de sjloes. Zo gezagdj, zo gedaon!
China is calling…
Donderdig 1 augustus: De ieërste contacte mit China gelagtj.. wantja, ich wil get laote make.. enja, volges Chinese traditie mosse dao de tied veur numme (transport doert Lang, dae trouwes ouch eine Chinees is).
Adjes (deil 2)…
Vriedig 2 augustus: Ouch miene bovenbuurman William Schalley gevraogd om biej de club van adjes te komme. William mos 2 kieër laeze.. mer sjprong daonao waal 1,5m in de loch! Compleet!
Euverlig biej de vorst:
Woonsdig 15 augustus De ieërste kieër det v’r compleet zeen. Bart geit ’t sezoen doornumme, zodet idderein ein bietje weit waat der te gebeure steit..
Prinsepak…
Woonsdig 22 augustus: Dae ieërste kieër det ich ’t prinsepak moog passe… waat ein geveul! En wie gaaf om dich den in de sjpeegel te moge zeen. Pak waas mich get te groeët, dus mos oeteraard get aangepast waere…
De staek en vaere…
Woonsdig 18 augustus: De aafspraok biej Thetru veur miene prinsestaek. Hieël erg gaaf om dao via ein trepke nao eine zolder te gaon, woe letterlik ’t Walhalla van de Vastelaovendj is.. zo väöl versjillendje staeke haaj ich nog neet gezeen. Ich höb mich ein sjoon staek oetgezochtj. Noe hope det alles op tied klaor is… mer ich dink det ich in de tussetied fazante gaon haoje.. sjeetje, waat zeen die vaere duur!
China is calling (deil 2)…
Dinsdig 10 september: Vanoet mien vakansie in Italië mit Tim natuurlik intens contact gehadj mit China. En jao, nao hieël get onjerhanjele zeen v’r der aan oet. De deal is gemaaktj.. aan ’t werk dao aan de angere kantj van de waereld!
Pekskes en sjoon van de adje’s zeen bestiltj…
Vriedig 27 september: de kogel is door de kirk.. de pekskes zeen bestiltj. Gelökkig waere ze waal door mien mam nog omgeturnd tot pekskes mit korte moewe en korte boks! Angers väöl te werm in den Tegel…
Schlager (deil 2)…
Zunjig 30 september: Us kieke wie det allemaol wirktj mit de audiomixer! Oeteindelik mit 7 sjpore aan de sjlaag gegange.. mer resultaat vonj ich nog neet good genog.
Nog ff sjnel de waereldj zeen (mien hobby en passie)…
Tusse al ’t geregel door toch nog wig kinne gaonin september en oktober:
- 1 waekske mit Tim nao Italië gewaest
- 1 waekske nao New York gewaest
- 1 lange daag & nacht mit Roy nao Haare gewaest
- nog ein lank weekend Oktoberfest en daonao nog ein lank weekendj wanjele in Zuid-Bayern mit Roy.
Yes, v’r zeen der klaor veur! Veurluipig inkel Lin en omsjtreke!
Sjnoeisessie…
Vriedig 25 oktober: Tja, es op dien fotolocatie ’t onkroed en de netele eine maeter hoog staon, mosse gaon sjnoeie.. Merja, det viltj op esse det euverdaag duis. Oftewaal ’s murges om 5:45u (nao mien rundje MTB-en) mit ’t kapmetz de onkroed verwijderd.. Zodet der ruumte is veur de de prinsefoto’s…
11e v.d. 11e…
Maondig 11 november: Jaja, eindelik de sjtart van ’t sezoen! Ieërst in Berg gewaest en ‘s aoves de Vastelaovendj in Lin ingeluujt!
Prinsepak (deil 2)…
Woonsdig 13 november: Gaaf! ’t Pak is klaor en de aanpassingen zeen gedaon! Laot mer komme die daag!
Schlager (deil 3)…
Zunjig 17 november: Get effecten toegevoogd (om mien zangkunstje te verhulle) en nog tal van zake aangepast.. Dit geit hum waere!
Woonsdig 20 november: vanaaf 12u de ganse daag in de Harmo gewaest.. samen mit Sil en Marvin alles opgeboewdj van leecht en geluid.. Sil: ”hey, ich höb nog 2 extra moving heads (leecht)? Zal ich die ouch ophange?” Ich: “Jao, doot mer.. vindj de nuje prins vast leuk!”
Starte mit de SMSjes…
Donderdig 21 november: Ich haaj inmiddels al hieël get versjillendje berichtjes klaorgezat om versjtuurd te waere nao diverse luuj.. Bietje sjteuke.. altied leuk! Veural die reacties en belletjes truuk!
Opboewe prinseborrel & Nach van de Aoje…
Vriedig 22 november: Ieërst mit mien adjes mien eige kooi leeggehaold en opgeruumd veur de borrel op zunjig.. Daonoa nao de Nach van de Aoje… Sjpannendj.. mer gelökkig kom ich pas rondj 23u binnen, vanwege eine borrel van de Maasgouw Ongernummers.. Geweldige aovendj biej Marja! Natuurlik werd der volop gespeculeerdj euver de SMSjes.
Oetroope…
Zaoterdig 23 november: Eindelik! Nao 125 daag wachte, moge v’r! Waal ieërst nog ff opbouwe.
Daonao sjnel alle letste dinger klaor make veur de borrel! En dan hoppa richting de zaal. Ongertusse ving Roy Leduc mien vrunj oet Hael, Bieëgdje en Remunj op.. wantj die dachte det der ein verjaordigfieëske woor biej mich thoes… Det woor toch net get angers…
22:35u: eindelik.. dao gaon v’r.. De Verraojers geit beginne!
22:53u: Ich gaon de bühn aaf biej de sketch.. ich höb nog diek 3 minute om mich om te kleije toet prins. Tied zat!
22:54u: Help! Spraekkanon Paco kaltj veur ’t ieërst väöl te kortj.. Noe nog mer ein kleine minuut! En ich mot nog alles aantrikke! Det wurdtj tovere!
22:55u: Yes, mit nog 3 seconde op de teller net op tied klaor! Gaas! Fieëst! Onbesjriefelik!
The day after…
5:00u: mien letste adje geit nao hoes.. Ich nog de kooi opgeruumd en gepoetst veur de borrel.
7:20u: zelf nao bid.
9:20u: richting de vistrappe.. veur ’t ieërst duke mit prinsestaek en septor en get versiere dao!
10:45u: ieërste adjes versjiene… fris en fruitig.. ofja, bienao..
11:30u: foto’s maken mit de vereiniging biej de vistrappe
12:30u: eine drinke biej de moedige Manne biej Den Tegel.. ok, twee den…
13:30u: sjnel door nao ’t BCL in Remunj en mitlaupe in de langste polonaise
14:00u: sjnel door nao Bracht: Oetroope van de Hoonder.. toch ffkes ’t gezich laote zeen
15:15u: sjnel truuk, want de borrel begint zo biej de prins.. och, det bin ich zelf..
15:29u: klaor veur de borrel! Ff de kooi oppe kop zitte! Waat ein fieëst!
China is coming…
Dinsdig 26 november: Die Chineze höbbe hel doorgewerktj.. alles in binne! Wacht mer aaf 😊
’t daagbook geit oeteraardj door.. mer sjooner is es g’r der zelf deil van oet maaktj!
Laote v’r same de Vastelaovendj in duke!
